Bretaprins hættir við að heimsækja Peshawar

Karl Bretaprins hefur aflýst ferð sinni og Kamillu konu sinnar til Peshawar í norðvesturhluta Pakistans, samkvæmt ráðleggingum frá pakistönskum yfirvöldum. Opinberlega var engin ástæða gefin fyrir breytingunni önnur en ráðleggingar pakistanskra stjórnvalda, en líklega var óttast um öryggi prinsins eftir að sprengjuárás á grunnskóla varð 80 manns að bana í dag.

Heimsókn Karls og Kamillu til Peshawar átti að vera einn af hápunktunum í fimm daga Pakistansheimsókn hjónanna. Meðal annars ætlaði prinsinn að heimsækja íslamskan skóla, sem þótti ansi djarft, jafnvel fífldirfska, þar sem margir íslömsku skólanna í héraðinu eru harla andvígir Vesturlöndum og eru sumir taldir hafa tengsl við hryðjuverkasamtök.

Árás pakistanskra herþyrla á skólann fyrir dögun í morgun beindist að sögn hersins gegn skæruliðum sem höfðu þar bækistöð sína. Heryfirvöld neita því statt og stöðugt að konur og börn hafi verið meðal þeirra 80 sem létust í árásinni.