Vísuðu ólöglegum Kínverjum á brott

Yfirvöld í Úkraínu vísuðu í dag 87 Kínverjum úr landi er upp komst um tilraun þeirra til að fara ólöglega yfir landamærin við Ungverjaland og Slóvakíu á leið sinni til Ítalíu. Ítalía er lokaáfangastaður margra ólöglegra innflytjenda frá Kína.

Yfirmaður útlendingaeftirlitsins í Úkraínu segir að ríkisborgarar margra annarra landa svo sem Bangladesh, Tyrklands, Indlands og Pakistan, reyni að komast til landa Evrópusambandsins í gegnum Úkraínu. Á síðasta ári var um hundrað þúsundum ólöglegra innflytjenda vísað úr landinu en landamæraverðir hafi sett rúmlega sjöþúsund ólöglega innflytjendur í varðhald á síðustu fimm mánuðum.