Mikil spenna í Palenstínu

Mikil spenna er í Palestínu eftir skotbardaga milli andstæðra fylkinga á Gaza landræmunni í morgun. Þetta er martröð flestra Palestínumanna á herteknu svæðunum. Skotbardagar milli andstæðra fylkinga, Fatah hreyfingarinnar og Hamas. Fatah hefur verið ráðandi meðal Palestínumanna alla tíð þangað til Hamas náði óvænt meirihluta á palestínska þinginu í kosningum fyrr á þessu ári.

Þeir fengu þó ekki forsetaembættið, og Abbas forseti stjórnar öryggissveitum á svæðum Palestínumanna. Hamas mönnum svíður að vera komnir í stjórn en ráða ekki yfir lögreglu eða her. Þeir eru hins vegar með vopnaðar skæursveitir og fyrr í þessari viku gáfu þeir þessum skæursveitum opinbera stöðu og sögðu að þær yrðu innlimaðar í palestínsku lögregluna.

Skotbardaginn í morgun var á milli þessara sveita og lögreglunnar, sem eru að mestu hollar Fatah samtökunum. Annar árekstur varð svo þegar verðir á landamærunum við Egyptaland gerðu um sextíu milljónir króna upptækar af háttsettum embættismanni sem reyndi að komast þar í gegn. Hann var með seðlana límda um sig miðjan. Hamas stjórnina sárvantar féð, enda hefur hún ekki getað greitt laun í tvo mánuði. En peningarnir eru í vörsu landamæravarða sem eru hollir Fatah hreyfingunni - og ekki er það til að lægja öldurnar milli þessara tveggja fylkinga Palestínumanna.