Þrír færeyskir drengir dóu í bruna

Færeyingar eru harmi slegnir eftir að þrír piltar á aldrinum sex til tíu ára létust í eldsvoða í gærkvöldi. Eldsupptök eru ennþá ókunn en danskir sérfræðingar vinna að rannsókn málsins.

Það var um níuleytið í gærkvöld sem slökkviliðið í Þórshöfn fékk tilkynningu um að eldur logaði í nýlegu parhúsi úr timbri við Hrafnseyjargötu. Allt tiltækt lið var samstundis sent á vettvang en það var um seinan því húsið var þá þegar alelda. Af verksummerkjum að dæma virðist eldurinn hafa komið upp í eldhúsinu en þar voru skemmdirnar mestar. Innar í húsinu voru þrír piltar að leik, tveir bræður, sex og níu ára, og tíu ára gamall vinur þeirra, en foreldrar bræðrana höfðu brugðið sér yfir í hús nágrannans og skilið þá eftir eina heima. Eftir nokkra leit fundu reykafarar litlu drengina látna inni í einu herbergjanna. Talið er að þeir hafi látist úr reykeitrun. Færeyingar eru að vonum miður sín vegna þessa harmleiks.

Ekki er vitað hver upptök eldsins voru en Þórshafnarlögreglan telur þó útilokað að hann hafi verið kveiktur af ásetningi. Danskir sérfræðingar komu til höfuðstaðarins í dag og hefur rannsókn málsins verið falin þeim.