Fuglaflensan meiri ógn en alnæmi

Banvænn stofn fuglaflensunnar er meiri ógn við mannkynið en alnæmi og allir aðrir smitsjúkdómar sem komið hafa upp. Þetta er mat sérfræðinga við Alþjóðaheilbrigðismálastofnunina.

Á síðustu tveimur mánuðum hefur fuglaflensan breiðst til sautján nýrra landa, nú síðast til Póllands og Austurríkis, og mikill ótti hefur gripið um sig um gjörvalla heimsbyggðina. Þessi ótti er alls ekki ástæðulaus að mati Margaret Chan, sem leiðir starf Alþjóðaheilbrigðisstofnunarinnar gegn útbreiðslu fuglaflensu.

Í erindi sem hún hélt í Genf í gær, sagði hún sérfræðinga sammála um að fuglaflensan gæti átt eftir að reyna meira á þolmörk heimsbyggðarinnar, en nokkur annar faraldur í sögunni.

Sem stendur væri ekki ástæða til að örvænta, en ef flensan stökkbreyttist og byrjaði að berast beint á milli manna, yrði að beita öllum tiltækum ráðum til að koma í veg fyrir gífurlegt mannfall og algjört efnahagslegt hrun.

Chan segir að þar sem veiran berist með andrúmsloftinu, sé hún mun hættulegri en HIV, eða nokkur annar smitsjúkdómur sem hefur herjað á mannkynið undanfarna öld.

Útbreiðsla fuglaflensunnar hefur nú þegar kostað 300 milljón bændur um allan heim allt að tíu milljörðum dollara, eða sem nemur rúmum sex hundruð milljörðum króna.