3 drengir létust í eldsvoða í Færeyjum

Þrír drengir, 6, 9 og 10 ára, fórust í eldsvoða í Þórshöfn í Færeyjum í gærkvöldi. Eldur kviknaði í parhúsi við Hrafnseyrarveg í bænum en þegar slökkvilið kom á vettvang voru drengirnir allir látnir úr reykeitrun.

Tveir þeirra voru bræður en sá þriðji var gestur hjá þeim. Húsráðendur höfðu brugðið sér í kvöldkaffi hjá nágrönnum þegar eldurinn kom upp.

Danskir rannsóknarlögreglumenn eru nú á leið til Þórshafnar til að rannsaka eldsupptök, en að sögn færeysku lögreglunnar nú fyrir stundu, virðist eldurinn hafa komið upp í eldhúsinu, án þess að vitað sé frá hvaða tæki það var.