Fær ekki að nota egg sín

Natalie Evans varð ófrjó eftir að hún gekkst undir aðgerð vegna krabbameins árið 2001 en þá þurfti að fjarlægja eggjastokka hennar. Áður en það var gert voru sex egg tekin úr henni og frjóvguð með sæði Howards Johnstons, þáverandi unnusta hennar. Þau voru hins vegar hætt saman þegar Natalie vildi nota frjóvguðu eggin og þá dró Howard til baka samþykki sitt fyrir að Natalie notaði þau.

Bresk lög gera ráð fyrir að hvort tveggja sá sem leggur til eggin og sá sem leggur til sæðið þurfi að samþykkja notkun eggjanna á hverju sviði og því gat Natalie ekkert gert án samþykkis Howards. Hún leitaði til Mannréttindadómstóls Evrópu en tapaði máli sínu þar. Sjálf segist Natalie þó ekki ætla að gefast upp og biðlar enn til fyrrum unnusta síns að leyfa henni að nota eggin. Það tekur hann ekki í mál og segir að fái Natalie að nota eggin viti hann alla tíð að hann eigi barn en hafi sjálfur ekkert tilkall til þess.