Mótmæltu skerðingu réttinda

Þúsundir manna gengu um götur Parísar í dag til að mótmæla nýjum lögum sem gera vinnuveitendum auðveldara en áður að segja ungu fólki upp störfum. Efri deild franska þingsins samþykkti lögin í gær og þau eiga að taka gildi á fimmtudag.

Franska stjórnin vonast til að lögin verði til þess að fyrirtæki verði viljugri til að ráða ungt fólk í vinnu. Þannig vilja stjórnvöld vinna gegn miklu atvinnuleysi meðal ungs fólks.

Verkalýðsfélög hafa hins vegar brugðist ókvæða við og segja að með þessu sé verið að veikja vinnuréttarstöðu ungs fólks.