Flugvöllur rýmdur í Svíþjóð

Rýma þurfti Landvetter-flugvöll rétt fyrir utan Gautaborg í Svíþjóð í dag þar sem dularfullur pakki fannst þar eftir að vopnað rán var framið í banka á vellinum skömmu áður.

Ræningjarnir flúðu í bíl sem leið lá til Gautaborgar og stuttu síðar fann lögregla tvo bíla í ljósum logum á þeirri leið sem talið er að mennirnir hafi farið. Dularfulli pakkinn fannst síðan nálægt hliði á vellinum. Ekki liggur fyrir hvað var í honum.

Landvetter-flugvöllur er sá næst stærsti í Svíþjóð en um þrjú hundruð þúsund farþegar fóru þar um í flug til og frá landinu í síðasta mánuði.