Offita barna mun tvöfaldast á næstu fimm árum

Einn gosdrykkur á dag getur valdið sjö kílóa þyngdaraukningu á einu ári hjá börnum. Offita barna mun tvöfaldast í Evrópu á næstu fimm árum ef ekki verður gripið til róttækra aðgerða.

Samkvæmt niðurstöðum viðamikillar athugunar alþjóðlegra samtaka gegn offitu, stefnir allt í að tuttugu og sex MILLJÓNIR barna í löndum Evrópusambandsins verði of þung árið 2010 og þar af muni tæplega sex og half milljón þjást af offitu. Það er helmingi meira en nú.

Þá muni hlutfall offitu meðal barna hækka um ellefu prósent í Mið-Austurlöndum á sama tímabili og fimmtán prósent í Suður-Ameríku. Í Asíu, sem er sú heimsálfa þar sem offita er nú langminnst meðal barna, fer ástandið líka versnandi og þar mun offita barna þrefaldast á næstu fimm árunum samkvæmt úttektinni.

Rannsakendur segja niðurstöðurnar varlega áætlaðar og ástandið gæti þess vegna átt eftir að verða verra en gert er ráð fyrir í skýrslunni.

Ný bandarísk rannsókn bendir til þess að ein leið til að sporna við þessari þróun sé að koma í veg fyrir neyslu sykraðra drykkja. Ein hálfs lítra flaska af gosdrykk eða sykruðu djúsi á dag, getur leitt til allt að sjö kílóa þyngdaraukningar á einu ári hjá börnum samkvæmt rannsókninni.

Rannsóknin náði til hóps unglinga, sem skipt var í tvo hópa. Annar hópurinn fékk ströng fyrirmæli um að forðast sykraða drykki á meðan á rannsókninni stóð, en hinn hópurinn hélt neyslumynstri sínu óbreyttu. Í ljós kom að hópurinn sem dró úr sykurdrykkjunni grenntist verulega og áhrifin voru mest hjá þeim þyngstu. Þannig virðist það geta skilað börnum sem eru allt of þung sérstaklega miklum árangri að draga úr neyslu gosdrykkja.