Ísinn á Suðurskautslandinu bráðnar hratt

Íshellan á Suðurskautslandinu hefur minnkað umtalsvert vegna bráðnunar á síðastliðnum árum, þvert á fyrri spár vísindamanna. Merkjanleg hækkun hefur orðið á yfirborði heimshafanna beinlínis af þessum völdum.

Á heimsráðstefnu um loftslagsbreytingar sem haldin var árið 2001 var það samdóma álit vísindamanna að suðurskautsísinn myndi ekki bráðna svo mikið á næstu árum að yfirborð heimshafanna myndi hækka. Niðurstöður vísindamanna úr Boulder-háskóla í Colorado benda hins vegar til að endurskoða verði þetta mat, því verulega hefur saxast á ísinn síðan árið 2002.

Að þeirra sögn hafa um það bil 152 rúmkílómetrar af ís bráðnað á hverju ári, sem jafngildir vatnsnotkun Bandaríkjamanna á þremur mánuðum.

Sjávarborðið hefur hækkað að meðaltali um 1,2 millimetra í heiminum síðastliðin þrjú ár, beinlínis vegna þessarar bráðnunar, en það er hér um bil þriðjungur þeirrar heildarhækkunar sem verður á sjávarborðinu ár hvert síðastliðna áratugi. Hinum megin á hnettinum er ástandið ekki mikið betra því nýlega greindu vísindamenn frá því að Grænlandsjökull bráðnaði nú með tvöfalt meiri hraða en hann gerði fyrir fimm árum.