Ræddi um kjarnorku og lék krikket

Bush kom til Pakistan á föstudaginn frá Indlandi en þar gerði hann sögulegt samkomulag við Manmohan Singh, forsætisráðherra Indlands, um samvinnu í kjarnorkumálum. Enda þótt Bush sé ánægður með framgöngu Pervez Musharraf, forseta Pakistans, í baráttu sinni gegn hryðjuverkamönnum vildi hann ekki veita Pakistönum nein svipuð loforð um þróun kjarnorkuvinnslu. Litlir kærleikar eru á milli Indverja og Pakistana og búa bæði ríkin yfir kjarnavopnum, og því vekur athygli að aðeins annað ríkið nýtur fyrirgreiðslu í þessum efnum hjá þessu voldugasta ríki heims. Bush gerði sér fleira til dundurs en að sitja á fundum, meðal annars brá hann sér á krikketvöll og sveiflaði þar kylfum af miklum móð. Enda þótt forsetinn sé slyngur hafnaboltaspilari brást honum þó bogalistin með hafnaboltakylfuna því einn kastaranna varpaði boltanum í höfuð hans. Bush gerði þó góðlátlegt grín að öllu saman. Undir kvöld héldu svo hann og Lára, eiginkona hans heim með forsetaflugvélinni Air Force One.