Talabani styður ekki al-Jaafari

Stjórnarmyndunarviðræðurnar í Írak flæktust enn í dag þegar Jalal Talabani forseti lýsti því yfir að hann styddi ekki lengur Ibrahim al-Jaafari forsætisráðherra til áframhaldandi setu.

Þótt tæpir þrír mánuðir séu liðnir síðan Írakar kusu sér nýtt löggjafarþing á grundvelli nýrrar stjórnarskrár. Hvorki hefur gengið né rekið við að mynda nýja ríkisstjórn enda virðist hver höndin vera upp á móti annarri á meðal stjórnmálamanna landsins. Í dag sté Jalal Talabani, forseti og Kúrdi, fram og sagðist ekki geta stutt sjíann Ibrahim al-Jaafari til áframhaldandi setu í forsætisráðherraembættinu þar sem hann stuðlaði fremur að sundrungu en samstöðu í landinu. Talabani bætist þar með í hóp þeirra súnnía og veraldlega þenkjandi sjía sem hafa horn í síðu Jaafari sem er einn af oddvitum heittrúaðra sjía.

Jaafari hefur verið forsætisráðherra síðan í apríl 2005 en hann þykir ekki hafa staðið sig vel í embætti. Róstur eru ennþá miklar í landinu og tortryggni er enn mikil á milli þjóðarbrotana. Súnníar hafa sérstaklega gagnrýnt að sjíar virðast hafa sett herflokka sína undir verndarvæng innanríkisráðuneytisins, sem er undir stjórn sjía, og notað þá svo til að jafna sakirnar við súnnía frá fyrri tíð.