Kúariða greinist í Svíþjóð

Kúariða er komin upp í Svíþjóð en sérfræðingar Evrópusambandsins staðfestu í dag að veikin hefði greinst í kú á búgarði í miðhluta landsins. Ekki er vitað hvernig kýrin smitaðist en sýkt fóður er talin líklegasta skýringin. Kúariða hefur ekki greinst áður í Svíþjóð og því hefur kjöt þaðan sætt lágmarkseftirliti. Þar sem talið er að fólk geti veikst af hinum banvæna Creutzfeld-Jacobs sjúkdómi eftir að hafa borðað sýkt nautakjöt er hins vegar búist við að gripið verði til sérstakra ráðstafana í kjölfar þessara frétta.