Læknar segja meðferð fanga í Guantanamo ámælisverða

Rúmlega 250 læknar hafa skrifað undir bréf þar sem meðferð á föngum Bandaríkjahers í Guantanamo-fangelsinu á Kúbu er gagnrýnd. Sér í lagi gera læknarnir athugasemd við það að næring sé neydd ofan í þá fanga sem séu í mótmælasvelti.

Læknar í fangelsinu og fangaverðir þar verði að virða það ef fangar hafni meðferð. Fregnir hafa borist af því að fangar í Guantanamo sem svelti sig hafi verið ólanir niður í stóla og næringu síðan þvingað í þá. Um 80 fangar munu hafa farið í mótmælasvelti í fangelsinu í desember en nú eru þeir aðeins fjórir.

Læknarnir sem undirrita bréfið eru frá Ástralíu, Bandaríkjunum, Bretlandi, Hollandi, Írlandi, Ítalíu og Þýskalandi. Bréf læknanna er birt í hinu virta læknatímariti Lancet.