Öryggisráðið klofið vegna Hariri-málsins

Öryggisráð Sameinuðu þjóðanna er klofið í afstöðu sinni til sérstaks dómstóls sem skal rétta í máli sakborninga fyrir morðið á Rafik Hariri, fyrrum forsætisráðherra Líbanons. Bandaríkin styðja tillöguna enda er ríkisstjórn Líbanons undir verndarvæng Bandaríkjanna. Rússar draga hins vegar taum Sýrlendinga, sem almannarómur sakar um að hafa skipulagt morðið.

Bæði Rússar og Bandaríkjamenn hafa neitunarvald í öryggisráðinu og því mun hvorki ganga né reka meðan aðrir hvorir eru mótfallnir.

Styrinn stendur um skipan dómaranna. Rússar vilja að öryggisráðið skipi dómarana, en hin fjögur ríkin sem hafa neitunarvald telja að það muni skekkja ráðninguna og gera hana pólitíska. Tillaga þeirra er að Kofi Annan, framkvæmdastjóri Sameinuðu þjóðanna, skipi dómarana eftir nafnlausar ábendingar frá embættismönnum Sameinuðu þjóðanna.

Annað þrætuepli er tímasetningin, hvenær dómstóllinn tekur til starfa. Emile Lahoud, forseti Líbanons, sem styður Sýrlendinga að málum, sem og Hisbollah og fleiri stjórnmálaöfl, vilja að óháð rannsókn Sameinuðu þjóðanna á morðinu verði lokið áður en dómstóllinn tekur til starfa. Líbanska ríkisstjórnin, með Fouad Siniora í broddi fylkingar, vilja hins vegar að dómstóllinn taki sem fyrst til starfa.