Fjörtíu féllu í sprengjuárás

Að minnsta kosti fjörutíu féllu og hátt í níutíu særðust þegar spregjur sprungu á fjölförnum mörkuðum í tveimur borgum Íraks í gærkvöldi. Mannskæðari árásin var gerð í borginni Bakúba, norð-austur af Bagdad, þar sem sprengja hafði verið fest við reiðhjól. Borgin er eitt helsta vígi súnní-múslima. Önnur sprengja sprakk skömmu síðar í borginni Hilla suður af höfuðborginni. Þar eru sjíar fjölmennastir. Á báðum stöðum var krökt af fólki þar sem viðskiptavinir voru að versla mat fyrir kvöldið eða að kæla sig þar sem heitt hvaði verið í veðri fyrr um daginn. Skömmu áður en árásinar voru gerðar höfðu leiðtogar andspyrnuhópa súnnía haft samband við stjórnvöld til að ræða aðkomu þeirra að sáttaferli forsætisráðherra landsins.