Bandaríkin vilja taka við stjórn friðargæslu S.þ.

Bandaríkin vilja taka yfir stjórn friðargæslu Sameinuðu þjóðanna þegar Ban Ki-Moon tekur við embætti framkvæmdastjóra S.þ. um mánaðamótin. Fréttastofa Reuters hefur þetta eftir háttsettum bandarískum embættismanni sem ekki vill láta nafns síns getið. Frakkar stýra friðargæslunni eins og er.

Embættismaðurinn segir að Bandaríkin styðji kröfu sína með þeim rökum að þau leggi til rúman fjórðung fjármagns til friðargæslunnar. Bandaríkjamenn leggja hins vegar enga hermenn til friðargæsluliðsins, þar hafa Frakkar vinninginn. Franskir hermenn í Líbanon eru 1500 talsins og auk þess heldur franski herinn úti 4000 hermönnum í sérstöku friðargæsluverkefni á Fílabeinsströndinni. Bandaríkjamenn leggja friðargæslunni til 239 lögreglumenn í Kosovo og 48 lögreglumenn á Haiti.