Íraksþing kemur saman síðar í mánuðinum

Nýkjörið þing Íraks verður kallað saman til síns fyrsta fundar þann 12. mars næstkomandi. Illa hefur gengið að mynda þjóðstjórn í landinu og hafa átök sjía- og súnní-múslima síðustu vikur ekki hjálpað til í þeim efnum. Að minnsta kosti níu féllu í röð sprengjuárása í Bagdad og næsta nágrenni í morgun.

Að minnsta kosti fjórar sprengjur sprugu í Bagdad í morgun. Tveir létu lífið, lögreglumaður og almennur borgari, og þrír særðust þegar sprengja sprakk þar sem bílalest lögreglu fór um hverfi í norður hluta borgarinnar. Engan sakaði þega önnur sprengja sprakk rétt við mosku sjía-múslima í norður hluta Bagdad skömmu síðar.

Að minnsta kosti sex létu lífið, þar á meðal tvær stúlkur á fjórða ári, þegar bílasprengja sprakk nálægt markaði í Baquba, norður af Bagdad í morgun. Tuttugu særðust í árásinni, aðallega börn.

Af þessu má ljóst vera að ekkert lát er á átökum þjóðarbrota í landinu en rúmlega fimm hundruð manns hafa látið lífið í átökum sjía- og súnní-múslima síðan ein helgasta moska sjía var sprengd í loft upp fyrir tæpum hálfum mánuði.

Nýkjörið þing Íraks verður kallað saman til síns fyrsta fundar þann 12. mars næstkomandi. Jalal Talabani, forseti landsins, tilkynnti þetta í morgun. Þar með eru uppfyllt þau tímamörk sem stjórnarskrá hafa sett þinginu. Átök þjóðarbrota og tilraunir súnní-múslima og Kúrda til að koma Ibrahim al-Jaafari, forsætisráðherra, frá völdum hafa tafið fyrir myndun þjóðstjórnar í landinu.