Líbanskur klerkur segir Íran stjórna Líbanon í gegnum Hisbollah

Einn æðsti klerkur súnnímúslima, Mohammad Ali Jouzou, mufti í fjallahéraðinu Mt Lebanon, gagnrýnir Hisbollah-hreyfingu sjíamúslima fyrir að þjóna hagsmunum Írans og Sýrlands. "Öll afrek sem Hisbollah montar sig af eru verk Persa sem ekki þjóna aröbum á nokkurn hátt," sagði Jouzou í ræðu í dag. Frá þessu greinir í líbanska dagblaðinu Daily star.

Hann segir Íran stjórna Líbanon í gegnum Hisbollah, sem ásaki alla andstæðinga sína um að fylgja Bandaríkjamönnum að málum, sem að mati muftans er órökrétt niðurstaða. Einnig taldi hann engin haldbær rök fyrir því að "leggja landið í rúst" til þess að frelsa þrjá fanga úr ísraelskum fangelsum, en það var markmið Hisbollah með því að ræna tveimur ísraelskum hermönnum.