Mótmæla stjórnarfari Pútíns í Rússlandi

Andstæðingar Pútíns Rússlandsforseta ætla ótrauðir að koma saman og ganga fylktu liði um götur Moskvuborgar í dag, þrátt fyrir að stjórnvöld hafi bannað samkomuna.

Skákmeistarinn Garrí Kasparov, sem er einn þeirra sem standa að mótmælunum, segir gönguna vera „fyrstu tilraun okkar til að mótmæla, í samræmi við stjórnarskrána, með aðgerðum á götum úti og sameina fólk með gjörólíkar pólitískar skoðanir“.

Auk Sameinuðu borgarafylkingarinnar, sem Kasparov er í forsvari fyrir, taka þátt í aðgerðunum meðal annars hreyfing róttækra bolsévíka, sem nefnist Bolsévíski þjóðarflokkurinn, og frjálslyndir hægrimenn sem kalla sig Bandalag hægriafla.

„Breytingar geta því aðeins orðið í Rússlandi að skipulagðar séu sameiginlegar aðgerðir ólíkra stjórnmálaafla,“ sagði Kasparov, en mótmælunum er meðal annars beint gegn nýlegri breytingu á kosningalögum og vaxandi ofríki stjórnvalda, eins og mótmælendurnir orða það.

Lögreglan gerði á þriðjudaginn húsleit á skrifstofum Kasparovs og félaga hans í Sameinuðu borgarafylkingunni. Borgaryfirvöld hafa bannað mótmælagöngu, en hafa þó boðið upp á að leyfa mótmæla­samkomu í Moskvu.