14 látnir í Bagdad í dag þrátt fyrir útgöngubann

Útgöngubann tók gildi í Bagdad strax að loknum föstudagsbænum, klukkan tvö í dag að staðartíma, og verður til dagrenningar í fyrramálið. Það hefur þó ekki virkað sem skyldi, því þegar hafa að minnsta kosti 14 manns látið lífið í sprengjuárásum í Bagdad í dag.

Borgaryfirvöld í Bagdad neita þó að neyðarástand ríki í Bagdad venju fremur, en neyðarástandi var lýst yfir í borginni í síðasta mánuði. Bannið nú bætist ofan á bann við bílferðum sem hefur verið undanfarna föstudaga í fjóra tíma í kringum föstudagsbænir. Auk þess er að jafnaði útgöngubann í Bagdad frá 20:30 til sex um morguninn.

 Aðgerðunum er ætlað að stemma stigu við hryðjuverkum í írösku höfuðborginni. Íraska stjórnin hefur nú sett saman aðgerðaáætlun til að freista þess að snúa hryðjuverkamönnum af vegum ofbeldis og efna til friðar í borginni og landinu.