Bandaríkjamenn prófa eldflaugavarnir sínar

Bandarískt herskip skaut niður meðaldræga eldflaug rétt ofan við lofthjúp jarðar í gær. Bandaríkjamenn prófa nú nýjustu hlutana af eldflaugavarnarkerfi sínu, einmitt þegar Norður-Kóreumenn búa sig undir tilraunir á langdrægum eldflaugum, sem gætu náð alla leiðina til Bandaríkjanna.

Talsmaður bandaríska sjóhersins sagði þó að æfingin hafi verið skipulögð fyrir mörgum mánuðum síðan og hún tengdist ekki á nokkurn hátt vísbendingum um að Norður-Kóreumenn hygðust skjóta upp langdrægum eldflaugum sem hugsanlega myndu ná alla leiðina til Bandaríkjanna.

Yfirvöld í Suður-Kóreu, sem og Dich Cheney, varaforseti Bandaríkjanna, hafa þó gert lítið úr hættunni sem Bandaríkjamönnum stafi af norðurkóreskum eldflaugum, vopnabúr þeirra sé ekki háþróað og eldflaugavarnarkerfi Bandaríkjanna geti skotið niður eldflaugar sem ógni skotmörkum í Bandaríkjunum.

Bandaríski sjóherinn var ánægður með árangur tilraunanna í gær, sagði það ánægjulegt að tekist hefði að skjóta niður og eyðileggja sprengjuoddinn eftir að hann hafði skilist frá eldflauginni, en það er mun erfiðara að finna og fylgjast með oddinum eftir að hann hefur skilist frá eldflauginni. Sprengjuoddurinn var í um 160 kílómetra hæð yfir yfirborði jarðar þegar hann var skotinn niður.