Halda allir fram sakleysi sínu

Sjö afganskir karlmenn sneru í gær aftur til heimalands síns eftir margra ára fangelsun í Guantanamo-fangelsinu alræmda á Kúbu. Allir hafa þeir haldið fram sakleysi sínu, en segjast ekki hafa hlotið slæma meðferð í bandarísku fangabúðunum.

„Ég átti engan pening til að borga talíbönunum, svo að ég neyddist til að ganga til liðs við þá,“ sagði Abdul Rahman, einn fanganna. Rahman segir talíbanana hafa krafið sig um rúmar fjögur hundruð þúsund íslenskar krónur, annars yrði hann seldur til Bandaríkjamannanna. Hann segir þá svo hafa keypt sig fyrir 1,3 milljónir og sent til Guantanamo.

Þetta er áttundi hópurinn sem hefur verið sleppt úr fangelsinu, en alls hafa 47 Afganar fengið að yfirgefa það, síðan sjálfstæð stofnun var sett á fót árið 2004 til að hafa yfirumsjón með ferlinu. Nefndin segir sjötíu Afgana enn vera í haldi í fangelsinu.

Alaf Mohammad, 62 ára, var einnig í haldi í fimm ár, að hans sögn fyrir það eitt að vera múslimi. „Ég var bara bóndi í Helmand-héraðinu,“ sagði hann. „Ég er saklaus, þið getið spurt hvern sem er í þorpinu mínu, þeir þekkja mig. Eini glæpurinn minn var að lesa hið heilaga orð.“

Að sögn hans létust átján manns þegar bandaríski herinn réðst inn í hérað hans, þar á meðal frændi hans.