Forseti Palestínu boðar til kosninga

Forseti Palestínu, Mahmoud Abbas, tilkynnti í gær að hann muni boða til forseta- og þingkosninga við fyrsta tækifæri, mögulega í mars á næsta ári. Ríkisstjórn Hamas-samtakanna sagði ákvörðunina vera valdarán gagnvart palestínskum almenningi, en samtökin komust til valda í kosningum í janúar síðastliðnum. Í kjölfarið hefur Palestína verið beitt alþjóðlegum efnahagsþvingunum.

Leiðtogar Hamas hvöttu Abbas til að segja af sér og segjast munu mótmæla ákvörðuninni með friðsömum hætti.

Abbas hefur hvatt til myndunar þjóðstjórnar með Hamas og hans eigin flokki, Fatah, en samningaviðræður hafa ekki skilað árangri. „Kraftaverk þarf ef samningar um þjóðstjórn eiga að nást, eftir það sem Abbas hefur sagt í dag,“ sagði aðstoðarmaður forsætisráðherrans og Hamas-liðans Ismail Haniyeh. Hamas-samtökin telja ólögmætt að boða til kosninga. Ef samtökin ákveða að sniðganga kosningarnar mun það draga lögmæti þeirra í efa.

Abbas hefur sjálfur lýst því yfir að hann muni ekki sækjast eftir endurkjöri, en skortur á frambjóðanda hefur verið vandamál innan Fatah-hreyfingarinnar. Svo geti farið að hreyfingin tapi kosningunum og Hamas styrki stöðu sína enn frekar.

Tilkynning forsetans hlaut mikið lof hundruða stuðningsmanna í höfuðstöðvum hans á Vesturbakkanum. „Snúum okkur til fólksins, heyrum hvað það hefur að segja og leyfum því að dæma,“ sagði Abbas í ræðu sinni.

Tony Blair, forsætisráðherra Bretlands, sagðist styðja ákvörðun Abbas, en hann var staddur í Egyptalandi á ferð sinni um Mið-Austurlönd. „Abbas hefur lagt hart að sér að mynda þjóðstjórn, þar sem allir, þar á meðal Hamas, hafa fulltrúa,“ sagði Blair. „En hann er einnig að sýna að hann getur haldið áfram án þeirra, ef þeir vilja ekki taka þátt.“

Næstu kosningar áttu að fara fram árið 2009, en skoðanakannanir sýna að Fatah og Hamas hafa svipað fylgi.