Sýrlendingum kennt um morðið

Stjórnvöld í Sýrlandi og líbanskir bandamenn þeirra fá á baukinn í skýrslu rannsóknarnefndar Sameinuðu þjóðanna sem segir allt benda til aðildar þeirra að morðinu á Rafik Hariri, fyrrverandi forsætisráðherra Líbanons, í febrúar síðastliðnum. Í fyrrakvöld afhenti Detlev Mehlis, formaður rannsóknarnefndarinnar, öryggisráði SÞ og líbönsku ríkisstjórninni afrakstur ríflega fjögurra mánaða vinnu. Niðurstaða hennar er skýr: Flest bendir til beinnar aðildar sýrlenskra ráðamanna að tilræðinu. „Þegar höfð eru í huga þau miklu ítök sem sýrlenska og líbanska leyniþjónustan hafa í líbönskum stofnunum og stjórnmálalífi þá er erfitt að gera sér í hugarlund að svo þaulskipulagt banatilræði geti farið fram án vitneskju þeirra." Rannsóknarnefndin segir að sýrlenskir og líbanskir leyniþjónustumenn hafi undirbúið tilræðið í marga mánuði. Ahmad Abdel-Al, Líbani í sterkum tengslum við stjórnvöld í Damaskus, er sagður aðalskipuleggjandi tilræðisins en skýrslur um farsímanotkun hans vikurnar fyrir tilræðið sýna náin samskipti við alla þá sem nefndin grunar um græsku. Bróðir hans hringdi í Emile Lahoud, forseta Líbanons og lepp Sýrlendinga, nokkrum mínútum áður en bílsprengjan sem banaði Hariri -sprakk. Eitt vitni nefndarinnar segir að Sýrlendingar hafi ákveðið að láta myrða Hariri, sem alltaf var þeim óþægur ljár í þúfu, eftir að öryggisráð SÞ samþykkti ályktun fyrir rúmu ári þar sem brottflutnings sýrlenskra hersveita frá Líbanon var krafist. Sýrlenska ríkisstjórnin, sem í skýrslunni var jafnframt ásökuð um að reyna að afvegaleiða rannsóknarnefndina, neitar ásökununum staðfastlega. „Þetta er pólitísk yfirlýsing gegn Sýrlandi sem byggð er á vitnisburði manna sem eru þekktir fyrir hatur sitt á landinu," sagði Mehdi Dakhlallah, upplýsingamálaráðherra Sýrlands, í viðtali við al-Jazeera sjónvarpsstöðina í gær. „Skýrslan er hundrað prósent hlutdræg," bætti hann við. Lahoud Líbanonsforseti vísaði ásökunum á hendur sér á bug í yfirlýsingu sem hann sendi frá sér í gær og sagði rannsóknina hluta af rógsherferð gegn sér.