Neyðarástand á Yukatan-skaga

Tugþúsundir hafa yfirgefið heimili sín í Mexíkó, á Kúbu og á Flórída vegna fellibylsins Vilmu og hefur neyðarástandi verið lýst yfir á Yukatan-skaga þar sem búist er við að Vilma komi að ströndum í dag. Vilma er nú orðin að fjórða stigs fellibyl og mun að öllum líkindum fara um Flórídaskaga á sunnudag. Mikill viðbúnaður er viðhafður vegna bylsins og hafa ferðamenn sem og heimamenn á svæðunum ýmist leitað skjóls á flugvöllum eða í skýlum sem komið hefur verið upp á svæðunum. Vilma er enn fjórða stigs fellibylur og vindhraðinn 67 sekúndumetrar. Búast veðurfræðingar við að hækkun yfirborðs sjávar geti orðið allt að fjórir metrar og úrkoman 25 til 50 sentimetrar á Yukatan, á Kúbu og ef til vill víðar. Stöðugur straumur farþegavéla hefur verið frá helstu ferðamannastöðum og er talið að yfir 200 þúsund ferðamenn hafi stytt dvöl sína vegna Vilmu. Um helgina er síðan reiknað með að óveðrið fari yfir vesturodda Kúbu en taki eftir það stefnu á Flórída og geti þá enn sótt í sig veðrið.