Áfengisauglýsingabann samþykkt

Bann við áfengisauglýsingum í norskri löggjöf samræmist EES-samningnum að sögn EFTA-dómstólsins. Þó sé nauðsynlegt að meta aðstæður í hverju landi fyrir sig. Vefrit Viðskiptaskrifstofu Íslands greinir frá því í nýjasta tölublaði sínu að tímaritið Vinforum í Noregi hafi birt auglýsingu á frönskum vínum í desember 2003, en slíkar auglýsingar stríða gegn banni við birtingu áfengisauglýsinga í Noregi. Útgefendur tímaritsins voru kærðir af þeim sökum til norska Markaðsráðsins sem er sjálfstæð úrskurðarnefnd þar í landi. Útgefendurnir báru fyrir sig að bann við áfengisauglýsingum í Noregi samræmdist ekki ákvæðum EES-samningsins. Af þeim sökum ákvað Markaðsráðið að óska eftir ráðgefandi áliti EFTA-dómstólsins. Dómstólinn komst hins vegar að þeirri niðurstöðu að bann við áfengisauglýsingum gæti verið í samræmi við EES-samninginn. Dómstóllinn taldi nauðsynlegt að meta, í hverju tilfelli fyrir sig, hvort bann við slíkum auglýsingum væri líklegt til þess að ná markmiðum sínum og hvort mögulegt væri að grípa til annarra aðgerða sem skiluðu sama árangri, en trufluðu síður viðskipti með áfengi á Evrópska efnahagssvæðinu. Markaðsráðið hefur nú komist að þeirri niðurstöðu að bann við áfengisauglýsingum í Noregi sé í fullu samræmi við ákvæði EES-samningsins, einkum í ljósi þess að bannið er hluti af öflugri áfengisvarnarstefnu norska stjórnvalda.