Hannaði heimasíðu

Ungur Svíi sem grunaður er um þátttöku í hryðjuverkastarfsemi heimsótti hryðjuverka-foringjann Abu Musab al-Zarqawi í Írak, að því er breska dagblaðið The Times hermir.

Svíinn er einnig grunaður um að hafa sett upp vefsíðu fyrir al-Zarqawi en á slíkum síðum lýsa samtök hans gjarnan ábyrgð á tilræðum sínum. Leyniþjónustumenn í Evrópu telja að al-Zarqawi hafi fengið unga múslima frá Evrópu til að mynda sellur í álfunni. Sænski músliminn, sem gengur undir nafninu Maximus, er talinn vera einn af þeim og að hann hafi verið í þjálfun til að gera sjálfsmorðssprengjuárás síðar.

Maximus er af bosnísku bergi brotinn en býr nú í vesturhluta Svíþjóðar. Hann var handtekinn í Sarajevó fyrir mánuði og kemur fyrir dómstóla fljótlega. Honum er gefið að sök að hafa undirbúið hermdarverk.