Þúsundum barna og kvenna nauðgað

Tugþúsundum barna og kvenna hefur verið nauðgað í Austur-Kongó á síðustu árum samkvæmt nýrri skýrslu mannréttindasamtakanna Human Right Watch. Þau segja stjórnarhermenn og uppreisnarmenn ganga skipulega til verks og að fórnarlömbin séu frá fjögurra mánaða gömlum börnum til aldurhniginna gamalmenna. Mannréttindavaktin segir í nýrri skýrslu sinni að þúsundir stjórnarhermanna og uppreisnarmanna komist refsilaust frá ódæðum sínum. Algert stjórnleysi og ringulreið ríki í Austur-Kongó og þar séu 70 þúsund manns á vergangi eða í flóttamannabúðum vegna átaka á milli ættbálka. Í Ituri-héraði hafa 50 þúsund manns fallið á síðustu sex árum og börn niður í átta ára gömul taka þátt í bardögum. Í skýrslu Mannréttindavaktarinnar eru margar átakanlegar frásagnir. Þar greinir 32 ára gömul kona frá því hvernig tólf manna hersveit nauðgaði henni í síðustu viku þegar hún var á gangi á milli tveggja þorpa. Hún er þunguð og komin átta mánuði á leið en segist ekki hafa fundið lífsmark með barninu síðan henni var nauðgað. Fimm börn hennar voru með í för og segir konan að hermennirnir hafi misþyrmt börnunum. Hjálparsamtökin Læknar án landamæra segjast hafa meðhöndlað 2500 fórnarlömb nauðgana á síðustu 18 mánuðum. Þeir telja að tala fórnarlamba geti verið allt að 50 sinnum hærri, eða í kringum 125 þúsund þar sem konur séu hræddar að greina frá slíkum atburðum. Talsmenn þeirra segja ástandið ekkert hafa skánað og að nauðganirnar séu afar skipulagðar, auk þess sem stjórnvöld taki þessar fréttir ekki alvarlega. Þeir segja fórnarlömb nauðgana vera allt frá fjögurra mánaða gömlum ungabörnum til áttræðra kvenna.