Sex í haldi í Danmörku

Danska lögreglan leggur höfuðáherslu á að finna hver sé forsprakki í hópi manna sem eru grunaðir um að hafa ætlað að fremja hryðjuverk. Sex eru í haldi lögreglunnar vegna rannsóknar málsins.

Í gær voru karlmaður og kona um tvítugt úrskurðuð í varðhald í Danmörku, grunuð um þáttöku í skipulagningu hryðjuverkaárásar. Fyrr höfðu fjórir ungir menn frá sextán til tuttugu ára verið úrskurðaðir í varðhald. 6 manna hópurinn tengist grunuðum hryðjuverkamönnum sem eru í haldi lögreglunnar í Bosníu.

Rannsókn dönsku lögreglunnar beinist að því að uppræta mögulega deild hryðjuverkasamtaka í Danmörku. Hún segir þó að ekki megi búast við fleiri handtökum á næstunni. Hins vegar segir talsmaður lögreglunnar eðlilegt að rætt sé við fleiri í tenglsum við málið og skorar hann á alla sem hafi upplýsingar um málið að koma þeim til lögreglu.

Upplýsingaflæði dönsku lögreglunnar hefur verið gagnrýnt af verjendum hinna handteknu, sem segjast ekki hafa sama tækifæri til að tjá sig, þar sem málið sé rekið fyrir luktum dyrum. Lögreglan segir almannahagsmuni í húfi en viðurkennir þó að hún sé á gráu svæði.

Lágur aldur hinna handteknu vekur upp spurningar um hvort eldri einstaklingar standi að baki skipulagningu hópsins.

Talsmaður lögreglunnar segir það vissulega sæta furðu að einungis barnungir menn skuli handteknir vegna málsins. Hins vegar hafi ekkert komið fram við rannsókn lögreglu sem bent gæti til þess að eldri aðilar eða þekkt samtök tengist mönnunum.