Íslendingur slapp naumlega

Marín Ásmundsdóttir myndlistarmaður var í 25 metra fjarlægð frá einni af þremur sprengingum sem urðu meira en 60 manns að bana í Nýju-Delí í gær.

Paharganj markaðurinn í Delhi var yfirfullur af erlendum ferðamönnum í gær, þegar gífurleg sprenging varð. Þar var einnig Marín Ásmundsdóttir sem segir ringlureið hafa skapast í kjölfar hás hvells. Ryk, illa slasað fólk og lík lágu víða.

Á þriðjudag hefst Diwali ljósahátíð hindúa og margir voru í innkaupaferð vegna hennar. Að því leiti má líkja Paharganj í gær við Laugaveg á Þorláksmessu. Tilgangur sprengjumanna var augljós: að valda sem allra mestum mannskaða. Sprengjurnar þrjár voru sprengdar með nokkurra mínútna millibili. Ekki er vitað hverjir stóðu að þessum tilræðum en grunur beinist einkum að aðskilnaðarsinnum í Kasmír. Pakistanar og Indverjar hafa deilt um Kasmír síðan löndin fengu sjálfstæði frá Bretum eftir síðara stríð. Marín telur sig þó ekki í hættu.

"Mér finnst ég örugg hér núna, enda er öryggisgæslan slík hér núna að ég myndi að minnsta kosti ætla að það væri erfitt," sagði Marín.