Indverjar á verði

Indverjar eru vel á verði í kjölfar þess að þrjár öflugar sprengjur sprungu í miðborg Nýju Delhi í gær. Ekki færri en sextíu og einn féll, flestir óbreyttir borgarar sem voru að kaupa gjafir fyrir mikilvægar trúarhátíðir hindúa og múslíma.

Rannsóknarlögreglumenn fínkemba nú vettvang sprenginganna í leit að vísbendingum en fjölmiðlar á Indlandi sem og alþjóðlegir sérfræðingar í öryggismálum gruna pakistanska aðskilnaðarsinna í Kasmír, sem eru mótfallnir friðarumleitunum stjórnvalda á Indlandi og í Pakistan. Raunar hefur áður óþekktur hópur frá Kasmír gengist við árásunum, en ekki er vitað hvort eitthvað er að marka þá yfirlýsingu. Aðferðafræðin þykir hins vegar minna mjög á al-Qaeda.

Stjórnvöld í Nýju Delhí vilja hins vegar enn sem komið er ekki kenna neinum um árásirnar fyrir utan að segja þær hryðjuverkaárásir.

Hundrað og tíu eru enn særðist á sjúkrahúsum og yfirvöld ráðleggja fólki að vera ekki á ferli á mörkuðum eða öðrum stöðum sem alla jafna eru fjölsóttir. Ótti er meðal fólks í Nýju Delhí en fréttamenn á vettvangi segja að ferðamenn og borgarbúar séu þrátt fyrir þetta á ferli og reyni að láta sem ekkert sé.