Segja ökumann hafa óhlýðnast

Talsmaður Bandaríkjahers segir að ökumaður bíls með ítölskum gísl, sem nýbúið var að leysa úr haldi í Írak, hafi ekki sinnt viðvörunarskotum. Því hafi verið skotið á bílinn með þeim afleiðingum að gíslinn særðist og björgunarmaður hans lést. Bandaríkjaforseti hefur fyrirskipað opinbera rannsókn á málinu. Í mánuð var ítalska blaðakonan Giuliana Sgrena í haldi mannræningja í Írak. Ítalskur leyniþjónustumaður, Nicola Calipari, hjálpaði til við að fá hana lausa. Þegar keyrt var að bækistöðvum Bandaríkjamanna hófu bandarískir hermenn að skjóta á bílinn með þeim afleiðingum að Calipari lést og Sgrena særðist. Talsmaður Bandaríkjahers segir að bíllinn hafi nálgast vegatálma hersins á miklum hraða og því verið talinn grunsamlegur. Hermennirnir hafi fyrst gefið merki og skotið viðvörunarskotum en síðan hafi þeir skotið á vél bílsins. Ítalskar fréttastofur greina frá því að Calipari hafi hent sér yfir Sgrena til að vernda hana þegar skotárásin hófst. Gabriele Polo, ritstjóri Il Manifesto sem Sgrena vinnur hjá, var ómyrkur í máli. Hann sagði þetta brjálæði. Þetta væri rökrétt afleiðing ástands sem væri algjörlega stjórnlaust og allir gætu skotið til að afvopna fólk. Hann fullyrti enn fremur að ekki hefði verið um að ræða mistök af hálfu Bandaríkjamanna vegna skorts á samskiptum heldur morð og um það hefði verið skrifað í Il Manifesto í dag. Sgrena var veikburða þegar hún kom til Ítalíu í morgun þar sem Silvio Berlusconi, forsætisráðherra landsins, tók á móti henni. Hann hefur átt erfitt með að fá landa sína til að sætta sig við þátttöku Ítalíu í Íraksstríðinu og kallaði eftir skýringum frá Bush Bandaríkjaforseta sem hét ítarlegri opinberri rannsókn á því hvernig þetta gat gerst.