Dregur úr óeirðum í Frakklandi

Enn dró úr óeirðum í Frakklandi í nótt, í kjölfar stórhertra aðgerða lögreglu um allt land. Í 38 hverfum, borgum og bæjum nýtti lögregla sér heimildir til að setja á útgöngubann eða beita öðrum neyðaraðgerðum til að sporna við óeirðunum. Alls voru 155 manns handteknir í nótt og kveikt var í um 300 bílum, sem er nærri helmingi minna en nóttina á undan.

Flestir Frakkar virðast ánægðir með harðar aðgerðir yfirvalda vegna óeirðanna. Í nýrri könnun blaðsins Le Parisien segjast þrír af hverjum fjórum styðja heimildir til útgöngubanns og nærri níu af hverjum tíu segja óeirðirnar með öllu ólíðandi. Óeirðir í Belgíu og Þýskalandi héldu áfram í nótt og þó að þær séu ekkert í líkingu við lætin í París undanfarið telja sérfræðingar að þær eigi þátt í því að gengi evrunnar hefur ekki verið lægra gagnvart dollaranum í meira en tvö ár.