Frakkar setja útgöngubann

Jacques Chirac Frakklandsforseti lýsti í gær yfir neyðarástandi til að hægt væri að setja á útgöngubann í þeim sveitarfélögum þar sem verstu óeirðirnar hafa átt sér stað að undanförnu. Þessi ráðstöfun á sér vart fordæmi í sögu Frakklands eftir stríð, en til hennar er gripið til að binda enda á verstu bylgju uppþota sem orðið hafa í landinu í áratugi.

Yfirlýsingin um neyðarástand, sem heimilar að sett sé útgöngubann þar sem ástæða þykir til, tók gildi á miðnætti í gærkvöld og er í gildi í tólf daga til að byrja með. Allt tiltækt lögreglulið hefur verið kallað á vakt til að fylgja útgöngubanninu eftir, einkum og sér í lagi í innflytjenda-úthverfunum norður af París. Herinn hefur ekki verið kallaður til.

"Þetta er nauðsynlegt til að flýta því að koma á friði og spekt," sagði Chirac á ríkisstjórnarfundi. Neyðarástandslögin sem Chirac ákvað að beita nú voru upprunalega sett árið 1955, er stríð Frakka í Alsír stóð sem hæst. Eftir að hafa staðið svo til ráðþrota gagnvart óeirðunum tólf daga í röð og horft upp á þær breiðast út til æ fleiri borga í landinu - og jafnvel út fyrir landamærin - sá ríkisstjórnin ekki annan kost í stöðunni en að grípa til svo róttækra ráðstafana.

Þeir sem staðnir eru að því að brjóta útgöngubannið eiga yfir höfði sér allt að tveggja mánaða fangelsi. Enn fremur munu sýslumenn og aðrir fulltrúar héraðsyfirvalda hafa vald til að úrskurða fólk í heimafangelsi, gera vopn upptæk og loka opinberum stöðum þar sem gengi koma saman.

Frá þessu greindi Dominique de Villepin forsætisráðherra í ræðu á þingi. Hann bætti því við að það myndi taka tíma að koma á lögum og reglu. En Villepin rétti líka út sáttahönd til innflytjendanna í "vandræðaúthverfunum" með því að viðurkenna að þeir mættu þola stöðuga mismunun, sem væri blettur á frönsku samfélagi.

"Þetta er ögurstund fyrir lýðveldið," sagði hann. Hvernig aðlögun innflytjenda að frönsku samfélagi væri háttað yrði að endurskoða. Fulltrúar mannréttindasamtaka lýstu í gær áhyggjum af flýtimeðferð sem dómstólum er ætlað að beita við afgreiðslu ákæra gegn meintum brennuvörgum og óeirðaseggjum.