Veita leyfi til að koma á útgöngubanni

Nokkuð dró úr uppþotum í úthverfum Parísar í gærkvöld eftir að frönsk yfirvöld tilkynntu að borgar- og sveitastjórnum yrði heimilt að setja útgöngubann til að stemma stigu við óeirðunum. Nóttin var þó ekki átakalaus því víða annars staðar í Frakklandi voru bílar brenndir og ráðist gegn lögreglu.

Óöldin í borgum og bæjum Frakklands hefur nú staðið tólf nætur í röð og nú virðast frönsk stjónvöld loks tilbúin að grípa í taumana. Domique de Villepin, forsætisráðherra Frakklands, tilkynnti í gær að yfirvöldum í þeim borgum og bæjum þar sem óöld hefur ríkt fengju leyfi til að koma á útgöngubanni til að takast á við vandann. Sérstakur ríkisstjórnarfurndur var haldinn í morgun þar sem þessi áform voru samþykkt og er búist við að bæjar- og borgaryfirvöld geti sett útgöngubann strax á morgun. Útgöngubannið verður sett í samræmi við hálfrar aldar gömul lög sem upphaflega voru sett til að takast á við ofbeldi í Alsír þegar Alsíringar börðust fyrir sjálfstæði sínu á árunum 1954-1962.

Þá sagði Villepin að stjórnvöld myndu gera hvað sem er til að koma á ró í landinu. Samþykkt hefur verið að styrkja þann lögreglumannahóp sem berst við óeirðaseggina um 1500, en nú glíma um átta þúsund lögreglumenn við vandann. Villepin útilokaði hins vegar að kalla til herinn.

Þrátt fyrir að öldur hafi aðeins lægt í úthverfum Parísar í nótt var víða kveikt í bílum annars staðar í landinu, þar á meðal í borgunum Lille og Toulouse. Ríflega þúsund bílar stóðu í ljósum logum í nótt og 330 voru handteknir vegna óláta, en tólf lögreglumenn særðust í átökum við óeirðaseggi. Þá var kveikt í tveimur skólum í héruðum norður af París.

Þegar hefur einn maður látið lífið í óeirðunum, en hann lést á sjúkrahúsi í gær eftir að hafa verið barinn til óbóta á föstudaginn var. Alls hefur verið kveikt í hátt í sex þúsund bílum, um 1500 manns hafa verið handteknir og 120 slökkviliðs- og lögreglumenn slasast í átökum við óeirðaseggi og elda.