Tími ríkisstjórnar Merkel strax á enda?

Ríkisstjórn Angelu Merkel í Þýskalandi var spáð tveggja ára líftíma eftir kosningarnar fyrir mánuði. Stjórnin hefur reyndar ekki ennþá verið mynduð en tími hennar virðist engu að síður liðinn.

Eftir kosningarnar í september tók við valdabarátta, sem endaði með því að Angela Merkel stóð uppi sem einskonar sigurvegari í slagsmálum jafnvígra.

Gerhard Schröder tapaði og hverfur von bráðar af þingi. Franz Müntefering, formaður Jafnaðarmannaflokksins, leiddi viðræður við Merkel,og Edmund Stoiber, forsætisráðherra Bæjaralands, stefndi að því að verða valdamesti ráðherrann.

Merkel stendur því ein eftir af fjórmenningaklíkunni sem hóf valdabaráttuna eftir kosningar, þó að Müntefering segist reyndar samt vilja verða ráðherra og varakanslari. Hann slær jafnframt á raddir sem efast um að grundvöllur sé fyrir samsteypustjórn í ljósi atburða vikunnar.

Münteferingsegir að flokkarnir vilji tryggja að fyrir lok næstu vikugeti samsteypustjórnin tekið ákvörðun sína. Þrátt fyrir úrtöluraddir telji hann flokkana á réttri leið og að samsteypustjórnin geti orðið að veruleika. Það kosti átak að koma henni á fót en hann viti að Þýskaland muni njóta góðs af henni.

Þjóðverjar vildu breytingar fyrir kosningar en kusu í raun stjórn sem líklegast þótti að stæði fyrir stöðnun. Nú virðist hins vegar að þeir hafi fengið breytingarnar sem þeir vildu: gömlu draugarnir eru að hverfa og nýtt fólk er að taka við, miklu fyrr og hraðar en nokkurn grunaði. Á næstunni skýrist hvað það hefur í för með sér.