Fimmtíu féllu í Nýju Delhi

Yfir fimmtíu féllu í röð sprengjuárása í Nýju Delhi, höfuðborg Indlands, í dag. Enginn veit hverjir standa á bak við árásirnar sem ráðamenn segja hryðjuverk.

Sprengjurnar sprungu um hádegisbil að íslenskum tíma en þá var komið kvöld í Nýju Delhi. Fjöldi fólks var á götum úti að kaupa gjafir enda aðeins nokkrir dagar til meginhátíðar hindúa á Indlandi. Múslímar búa sig undir lok Ramadan nokkrum dögum síðar.

Fyrsta sprengingin mun hafa orðið á fjölsóttum markaði skammt frá meginjárnbrautarstöðinni ekki langt frá þekktum hótelum. Skömmu síðar sprakk önnur sprengja á öðrum markaði. Þriðja sprengjan sprakk í iðnaðarhverfi í suðurhluta borgarinnar. Allt gerðist þetta á nokkrum mínútum.

Sjónarvottur að spreningunum lýsti því hvernig ein sprengjan hefði sprungið svo að segja fyrir neðan nefið á honum. Hann lýsti miklum reyk og ringulreið. Hann segir lík og slasað fólk hafa legið eins og hráviði um allt og lögregla og vegfarendur báru slasaða og lík inn í bíla sem kom þeim á sjúkrahús.

Enginn skýring hefur fengist á sprengingunum en harla ólíklegt þykir að þær hafi verið tilviljanir. Enginn hefur lýst þeim á hendur sér.