Ísraelsher haldi ekki aftur af sér

Ísraelsher hefur fengið þau fyrirmæli að halda ekki aftur af sér í leitinni að palestínskum uppreisnarmönnum, þrátt fyrir að Bandaríkjastjórn hafi hvatt hann til að fara sér hægt í allar aðgerðir. Herþotur héldu áfram skotárásum á Gasa í morgun.

Í morgun skutu ísraelskar herþotur tveim sprengjum á norðurhluta Gasa, en enginn slasaðist. Fyrr í morgun skutu herskáir Palestínumenn úr sprengjuvörpu í suðurhluta Ísraels, en þar slasaðist heldur enginn.

Í gær létust sjö Palestínumenn og fimmtán særðust í loftárás Ísraelshers á Gasa-svæðið. Fórnarlömbin voru á leið frá kvöldbænum þegar árásin var gerð. Einn þeirra sem lést var Shahdi Mhanna, einn æðstu manna uppreisnarhópsins Íslamska-Jihad. Fjóra daga í röð hafa sprengjuárásir gengið á báða bóga og allt er í upplausn á nýjan leik eftir átta mánaða vopnahlé. Síðan vopnahléið hófst hafa stöku árásir átt sér stað, en aldrei eins og síðustu dagana.

Í gær gaf Ariel Sharon ísraelska hernum opið skotleyfi á uppreisnarmenn á Gaza og Vesturbakkanum og í morgun ítrekaði Silvan Shalom utanríkisráðherra þessa stefnu Ísraelsmanna. Shalom sagði í morgun að palestínskum uppreisnarmönnum yrði ekki sýnd nokkur einasta miskunnþrátt fyrir viðvaranir Bandaríkjamanna til Ísraels um að hefja hernaðaraðgerðir á ný.

Leiðtogar bæði Palestínu og Ísraels eru aftur komnir í skotgrafirnar og ekki annað að sjá en vopnahléið sé nú ekkert nema orðin tóm.