Svíi handtekinn í Sarajevó vegna hryðjuverkaógnar

Fjórir múslimar sem voru handteknir í Kaupmannahöfn í gær eru grunaðir um að hafa ætlað að gera hryðjuverkaárásir í Evrópu, að öllum líkindum i Danmörku. Þá segja sænskir fjölmiðlar að átján ára Svíi hafi verið handtekinn í Sarajevó í síðustu viku, grunaður um að hafa ætlað að gera þar sjálfsmorðsárás.

Mennirnir fjórir eru á aldrinum sextán til tuttugu og ára, og hafa allir búið í Danmörku frá unga aldri, en aðeins einn þeirra er með ríkisborgararétt. Tuttugu til viðbótar voru handteknir í rassíu dönsku lögreglunnar í gær, en þeim var öllum sleppt að loknum yfirheyrslum.

Fjórmenningarnir hafa hins vegar þegar verið dæmdir í þriggja vikna gæsluvarðhald, samkvæmt ákvæði í dösnkum hryðjuverkalögum. Þetta er aðeins í annað sinn sem lögregla í Danmörku heldur mönnum í gæsluvarðhaldi samkvæmt lögunum, sem tóku gildi árið 2002.

Jorgen Bro, yfirmaður í dönsku lögreglunni, segir að ekki liggi fyrir hvar eða hvenær átti að gera árásina, en segir að fyrir liggi að mennirnir fjórir hafi verið búnir að skipuleggja árás í Evrópu á næstu vikum. Hann vill ekki staðfesta að árásin hafi átt að eiga sér stað í Danmörku, en útilokar það heldur ekki.

Danska lögreglan komast á snoðir um málið þegar kollegar þeirra í Sarajevó handtóku þrjá menn fyrir rúmri viku, sem einnig ætluðu að fremja hryðjuverk. Einn þeirra er átján ára Svíi að sögn sænska blaðsins Expressen. Í blaðinu í dag segir að sænski unglingurinn hafi ætlað sér að gera sjálfsmorðsárás á breska eða bandaríska sendiráðið í Sarajevó.

Þeir tengjast fjórmenningunum í Danmörku og hafa verið í samskiptum við þá. Í fórum þeirra var fannst mikið magn skotvopna og sprengiefna.

Í rassíu lögreglunnar í Kaupmannahöfn í gær var lagt hald á tölvur, farsíma og tölvudiska og bækur með eftir múslimska öfgamenn. Þá fundust einnig 200 þúsund danskar krónur, eða rétt rúmar tvær milljónir íslenskra króna, í reiðufé á heimili mannanna.

Að sögn dablaðsins Jyllands-Posten er aðgerðum lögreglunnar vegna málsins ekki að fullu lokið og þar er sagt að búast megi við að fleiri verði handteknir á næstu dögum.