Grunaðir um að skipuleggja árás í Danmörku

Fjórir múslímar sem voru handteknir í Kaupmannahöfn í gær ætluðu að gera hryðjuverkaárásir í Evrópu, að öllum líkindum i Danmörku. Mennirnir fjórir eru á aldrinum sextán til tuttugu og ára og eru allir danskir ríkisborgarar.

Tuttugu til viðbótar voru handteknir í rassíu dönsku lögreglunnar í gær en þeim var öllum sleppt. Fjórmenningarnir hafa hins vegar þegar verið dæmdir í þriggja vikna gæsluvarðhald.

Jorgen Bro, yfirmaður í dönsku lögreglunni, segir að ekki liggi fyrir hvar eða hvenær átti að gera árásina, en segir að fyrir liggi að mennirnir fjórir hafi verið búnir að skipuleggja árásina. Danskir lögreglumenn komust á snoðir um málið þegar kollegar þeirra í Sarajevó handtóku þrjá menn fyrir rúmri viku, sem einnig ætluðu að fremja hryðjuverk. Þeir tengjast Dönunum fjórum.

Í rassíu lögreglunnar í Kaupmannahöfn á heimili mannanna var lagt hald á tölvur, farsíma og tölvudiska og bækur með eftir íslamska öfgamenn. Þá fundust einnig 200 þúsund danskar krónur, eða rétt rúmar tvær milljónir íslenskra króna, í reiðufé á heimili mannanna.