20 þúsund enn í neyðarskýlum

Enn er ekki ljóst hvernig koma á upp heimilum fyrir þá einu milljón manna, kvenna og barna sem misstu heimili sín þegar fellibylurinn Katrína reið yfir suðurríki Bandaríkjanna fyrir tæpum tveimur mánuðum síðan. Bandaríska alríkisstjórnin, þingmenn og yfirvöld í ríkjunum þar sem fellibylurinn olli mestum skemmdum hafa ekki enn komið sér saman um hvað skuli gera til að leysa vanda heimilislausra. Óvíst er hversu stór hluti New Orleans verður endurreistur, hvort byggja eigi upp framtíðarhúsnæði fyrir heimilislausa annars staðar en á hamfarasvæðunum og hvort leggja eigi áherslu á að byggja leiguhúsnæði eða eignarhúsnæði. Í það minnsta tuttugu þúsund manns hafast enn við í neyðarskýlum sem voru sett upp í kjölfar hamfaranna. Um eitthundrað tuttugu og fimm þúsund manns gista á hótelum og rúmlega eitthundrað og fimmtíu þúsund manns dvelja hjá ættingjum og vinum. Á ferð sinni um New Orleans í síðasta mánuði lofaði George W. Bush Bandaríkjaforseti einhverju mesta uppbyggingarstarfi sem heimurinn hefði séð. Það tefur þó fyrir aðgerðum að deilt er um hvort nota eigi þorra þess fjár sem fer í uppbygginguna á hamfarasvæðunum sjálfum eða gefa fólki færi á að byggja sér upp framtíð þar sem það vill, hvort sem er þar sem það bjó áður eða annars staðar. Einnig er deilt um hvernig eigi að fjármagna uppbygginguna og hvaða ríkisútgjöld skuli skera niður á móti svo álagið á ríkissjóð verði ekki of mikið, hann er nú þegar rekinn með methalla.