Þróa bóluefni gegn flensuveirum

Danskir vísindamenn segjast hafa fundið fljótvirka aðferð til að þróa bóluefni gegn flensuveirum hvers konar. Þeir vonast til að hægt verði að nota þessa aðferð til að þróa bóluefni gegn fuglaflensunni áður en kemur til faraldurs. Þetta kemur fram í grein í Berlingske Tidende og þar er bent á að líftæknideild Danska tækniháskólans standi fyrir rannsóknunum. Hingað til hefur það tekið vísindamenn hálft ár að þróa bóluefni í eggjum sem sýkt hafa verið af veirum. En vísindamennirnir segja að með aðstoð tölvutækninnar geti þeir einangrað sýkt eggjahvítuefni mun fyrr en nú er gert. Þessi fljótvirka aðferð við þróun bólefnis er talin geta komið sér vel þar sem enn á eftir að finna bóluefni gegn fuglaflensunni. Þeir hafa nú þegar notað þessa aðferð við þróun bólefnis gegn ýmsum flensum og hefur aðferðin gefist vel. En danskir vísindamenn benda um leið á að biðin eftir bólefni geti tekið tvö til þrjú ár þar sem einnig þarf að gera tilraunir með bóluefnið á mönnum og músum. Danirnir segja að ef þeir fái fjárfesta geti uppfinning þeirra markað vatnaskil og fengið alla heimsbyggðina til að anda léttar, komi til fuglaflensufaraldurs innan næstu tveggja til þriggja ára.