Ungabörn auglýst til sölu á Netinu

Lögreglan í Sjanghæ í Kína rannsakar nú mál þar sem ungabörn voru auglýst til sölu á Netinu. Auglýsingin birtist síðastliðinn sunnudag á vefsíðu sem er í eigu uppboðsvefjarins E-Bay. Þar kom fram að börn sem öll væru innan við hundrað daga gömul fengjust keypt, og var verðið á drengjum 3.500 dalir, eða rúmar 200 þúsund krónur, en verðið á stúlkum var helmingi lægra. Að sögn lögreglu höfðu um fimmtíu manns skoðað auglýsinguna þegar málið komst upp en enginn reynt að ganga frá kaupum. Sala á börnum er mikið vandamál í Kína, meðal annars vegna þess að í borgum og einnig í sumum fámennari byggðum er bannað með lögum að eignast fleiri en eitt barn sökum fólksfjölgunarvandans sem ríkir í landinu.