Vill handtaka hermenn vegna morðs

Dómari við dómstól á Spáni hefur gefið út alþjóðlega handtökuskipun á hendur þremur bandarískum hermönnum í tengslum við dauða spænsks myndatökumanns í Írak. Maðurinn léstn í apríl 2003 þegar skotið var úr skriðdreka á Palestine-hótelið í Bagdad sem var aðsetur flestra blaðamanna skömmu eftir innrás bandamanna í Írak. Auk Spánverjans lést tökumaður á vegum Reuters í árásinni og þrír starfsmenn á vegum Reuters særðust alvarlega. Bandaríkjamenn segja hermennina þrjá ekki hafa gert neitt rangt en viðurkenna að skotið hafi verið úr skriðdrekanum. Dómarinn segir bandarísk yfirvöld hafa neitað að vinna með spænskum yfirvöldum að málinu og því hafi handtökuskipanirnar verið gefnar út, en samkvæmt ákæruliðum eiga hermennirnir yfir höfði sér allt að 20 ára fangelsi verði réttað yfir þeim og þeir dæmdir fyrir aðild að dauða tökumannsins.