Réttarhöldunum frestað

Réttarhöld yfir Saddam Hussein, fyrrverandi forseta Íraks, hófust í morgun en var frestað fyrir stundu að beiðni lögfræðinga hans til 28. nóvember. Hussein og sjö samstarfsmönnum hans er gefið að sök að hafa fyrirskipað morð á 150 sjítamúslimum eftir að reynt var að ráða Hussein af dögum árið 1982. Lögmenn Saddams hafa margoft sagt réttarhöldin ólögmæt þar sem innrás Bandaríkjamanna inn í landið hafi verið ólögleg og þar af leiðandi séu réttarhöldin ólögleg. Búist var við að réttarhöldunum yrði frestað en verjendur forsetans fyrrverandi fóru fram á þriggja mánaða frest. Saddam þurfti einungis að staðfesta hver hann væri í dómsal í dag en hann bætti þó við: „Hver eruð þið og hvað viljið þið?" Ákærur voru síðan lesnar upp og gengið frá ýmsum lagatæknilegum atriðum. Öryggisgæsla við réttarhöldin verður gríðarleg. Réttarsalurinn var sérstaklega byggður vegna þeirra en þau verða hins vegar lokuð almenningi og aðeins örfáir fjölmiðlamenn fá aðgang. Verði hinns 68 ára gamli Hussein og samstarfsmenn hans fundnir sekir, geta þeir átt yfir höfði sér dauðadóm. Þeir geta þó áfrýjað dómnum til sérstaks dómstigs, sem sérstaklega var sett á laggirnar til að fjalla um mál forsetans fyrrverandi og valdatíma hans. Mannréttindasamtök víða um heim hafa lýst yfir áhyggjum af því að Saddam fái ekki sömu meðhöndlun og aðrir sakborningar. Amnesty International ætla að senda þrjá menn til Bagdad sem verða viðstaddir réttarhöldin.