Vilja fresta réttarhöldunum

Lögfræðingar Saddams Hussein, fyrrum einræðisherra Íraks, hafa óskað eftir því að réttarhöldum yfir forsetanum fyrrverandi verði frestað um þrjá mánuði. Saddam og sjö samstarfsmönnum hans er gefið að sök að hafa fyrirskipað morð á 150 sjítamúslimum í kjölfar þess að reynt var að ráða Saddam af dögum árið 1982. Lögmenn Saddams hafa margoft sagt réttarhöldin ólögmæt þar sem innrás Bandaríkjanna inn í Írak hafi verið ólögleg og þar af leiðandi allt tengt réttarhöldunum ólöglegt. Búist er við að réttarhöldunum verði frestað en hvort um þrjá mánuði verði að ræða, líkt og verjendur forsetans fyrrverandi fara fram á, er ekki vitað. Verði Saddam og samstarfsmenn hans fundnir sekir geta þeir átt yfir höfði sér dauðadóm. Þeir geta þó áfrýjað dómnum til sérstaks dómstigs sem sérstaklega var sett á laggirnar til að fjalla um mál forsetans fyrrverandi og valdatíma hans.