Ken Clarke heltist úr lestinni

Ken Clarke heltist úr lestinni í fyrstu umferð leiðtogakjörs breska Íhaldsflokksins í gær. David Davis varð hins vegar hlutskarpastur fjórmenninganna sem berjast um embættið. Breskir íhaldsmenn velja sér um þessar mundir eftirmann Michael Howard sem sagði af sér embætti eftir þingkosningarnar í vor. Í gær fór fyrsta umferð leiðtogakjörsins fram en þá greiddu þingmenn flokksins atkvæði um fjóra frambjóðendur. Ken Clarke, fyrrverandi fjármálaráðherra, fékk fæst atkvæði í gær og er því úr leik. David Davis, David Cameron og Liam Fox eru hins vegar komnir áfram í aðra umferð en hún fer fram á morgun. 6. desember kjósa svo flokksmenn um þá tvo sem eftir eru. David Davis nýtur stuðnings flestra þingmanna flokksins, eða 66. Vinsældir Camerons eru aftur á móti taldar meiri á meðal almennra flokksmanna og því hallast veðbankarnir að sigri hans. Cameron hefur hins vegar verið gagnrýndur fyrir að neita að upplýsa hvort hann hafi neytt fíkniefna á sínum yngri árum og gæti það orðið honum fjötur um fót.