Evrópa ekki nógu vel undirbúin

Evrópa er ekki nógu vel undirbúin fyrir fuglaflensufaraldur, en allt verður gert til að bæta úr því, segir yfirmaður heilbrigðismála hjá Evrópusambandinu. Stöðugt fjölgar þeim Evrópulöndum þar sem grunur leikur á að flensan hafi stungið sér niður. Nú er verið að rannsaka sýni úr dauðum fuglum sem fundist hafa í Serbíu, Búlgaríu, Makedóníu og Króatíu, en veiran sem menn hafa sýkst af hefur þegar fundist í Grikklandi, Tyrklandi og Rúmeníu. Á grísku eyjunni Oinouses veit fólk eiginlega ekki sitt rjúkandi ráð eftir að kalkúnn sýktur af hinni alræmdu H5N1 veiru, fannst þar. Utanríkisráðherrar Evrópusambandsins funduðu um mögulegan fuglaflensufaraldur í dag og kölluðu eftir alþjóðlegri samvinnu til að koma í veg fyrir að hann brytist út.